लमजुङ – रिपोर्टिङकै क्रममा भिडियो पत्रकारको मृत्यु र मिडियामाथि भएको आक्रमणको विरोधमा लमजुङका पत्रकारहरू आन्दोलित भएका छन् । 

शुक्रबारको राजावादी प्रदर्शनका क्रममा समाचार संकलनका लागि भिडियो खिचिरहेको बेला प्रदर्शनकारीहरूले आगजनी गर्दा एभिन्यूज टेलिभिजनका पत्रकार सुरेश रजकको मृत्यु भएको थियो ।

यस घटनाको विरोधमा शनिबार नेपाल पत्रकार महासंघ लमजुङ शाखाको आयोजनामा बेसीशहरमा शान्तिपूर्ण विरोध प्रदर्शन भयो । भिमसेनस्थान चोकमा कोणसभा गरियो । 

कोण सभालाई सम्बोधन गर्दै नेपाल पत्रकार महासंघका केन्द्रीय सदस्य कृष्ण केसीले पत्रकार र मिडिया हाउसहरुमाथिको आक्रमणको कडा शब्दमा निन्दा गरे ।

पत्रकार महासंघका लमजुङ अध्यक्ष सन्देश पौडेलले पत्रकार रजकको मृत्युमा संलग्न दोषीहरूलाई कडाभन्दा कडा कारबाही गर्न माग गर्दै पीडित परिवारलाई उचित क्षतिपूर्ति दिनुपर्ने बताए ।