लमजुङ – मर्स्याङ्दी गाउँपालिकाको खुदी खोलामा २६ मेगावाटको माथिल्लो खुदी जलविद्युत आयोजना निर्माण गरिरहेको सुपर खुदी हाईड्रोपावर कम्पनीले सेयरको नाममा स्थानीयलाई झुक्काउने काम गरेको भेटिएको छ । 

कम्पनीले सेयर पुँजीको सिमा नखुलाई प्रभावित स्थानीय जनताका लागी संस्थापक सेयर खुलाएको र सेयर हाल्ने मिति सक्किएपछि मात्र सेयर पुँजीको सिमा तोकेर स्थानीयलाई झुक्काएको हो । 

कम्पनीले चैत्र १ गते सूचना निकाल्दै आयोजनाको मुख्य प्रभावित क्षेत्र, मर्स्याङ्दी गाउँपालिका–२ र ३ वडाका बासिन्दाको लागी आयोजनाको संस्थापक सेयरमा लगानी गर्न सुचना प्रकाशित गरेको थियो । 

कम्पनीले सो सूचना प्रकाशित भएको मितिले १० दिनभित्र अर्थात चैत्र ११ गतेसम्म ग्लोवल आई.एम.ई.बैँकमा रहेको सुपर खुदी हाईड्रो पावर लिमिटेडको खाता नं ३४४०१०१००००३०६ मा आफुले लिन चाहेको सेयर वरावरको रकम जम्मा गर्न भन्यो । सोहि अनुसार आवश्यक कागजात संलग्न गरी आयोजनाको कार्यालयमा पेश गर्न भनियो । 

सूचनामा एक करोड रुपैँयाभन्दा वढीको सेयर आवेदन दिनेको हकमा आयोजना निर्माणको क्रममा लिइएको ऋण प्रयोजनको लागी बैँकमा व्याक्तिगत जमानि समेत दिनुपर्ने उल्लेख छ । 

सूचना जारी भएलगत्तै मर्स्याङ्दी गाउँपालिका–२ र ३ वडाका बासिन्दाले जग्गा धितो राखेर, ऋण काढेर, चर्को व्याजमा पैसा सापट लिएर, गहना बेचेर दिनभर लाइनमा बसी हजार देखी करोड रुपैँया माथिसम्मको रकम बैँक खातामा जम्मा गरे । आयोजना स्रोतका अनुसार कम्पनीको बैँक खातामा ५० करोड माथिको रकम जम्मा भएको स्रोतले जनाएको छ । 

तर, आयोजनाले पछिल्लो सूचना जारी गर्दै कम्पनीको पुँजीको संरचना अनुसार १५ करोड ५० लाख भन्दा बढी रकम बराबरको संस्थापक शेयर कायम गर्न नसक्ने भन्दै जनतालाई झुक्काएको छ । 

चैत्र १३ गते बुधबार गाँउपालिको कार्यालयमा पालिका अध्यक्षको अध्यक्षतामा वडा अध्यक्षहरु, माथिल्लो खुदी जलविद्युत आयोजना समन्वय, सहयोग तथा सरोकार समिति अध्यक्ष र प्रतिनिधिहरुको उपस्थितिमा एक किसिमको सहमती गरिएको सूचनामा उल्लेख छ । 

सूचनामा भनिएको छ्, ‘एक लाख ५० हजार रुपैँयासम्म रकम जम्मा गर्नेको हकमा सम्पुर्ण रकम र सो भन्दा बढी रकम जम्मा गर्नेको हकमा सो एक लाख ५० हजार रुपैँया र सो भन्दा बढी रकमको ५ दशमलव ९ प्रतिशतले हुन आउने रकममा नजिकको १०० ले भाग जाने रकम बरावरको सेयर कायम गर्ने सहमति भएको छ ।’

आयोजनाले सेयरबारे पहिले र अहिले जारी गरेको सूचना ।

सूचनामा फिर्ता गर्ने रकमको लागि कागजात पेश गरेको स्थानमा चैत्र २० गते पश्चात सम्पर्क गर्न भनिएको छ । यसरी कम्पनीले सेयर पुँजीको सिमा नखुलाई प्रभावित स्थानीय जनतालाई झुक्काउने काम गरेपछि अहिले स्थानीय आक्रोशित बनेका छन् । 

अधिकांश स्थानीयले सामाजिक सञ्जालमा आयोजनाको यस्तो कदमप्रति टिकाटिप्पणी गर्दै बैँक खातामा जम्मा गरेको रकम बराबरको सेयर चाहिने, सो रकम बराबरको ब्याज दिनुपर्ने र यही विषयलाई लिएर मुद्धा हाल्ने सम्मको टिप्पणी गरेका छन् ।  

यता यस विषयमा आयोजना कम्पनीको धारणा बुझ्न प्रोजेक्ट म्यानेजर रवि गौतमलाई मोवाइल नम्बर ९८५११३०६७३ मा पटक–पटक फोन र म्यासेज गर्दा समेत कुनै प्रतिक्रिया आएन ।

यो पनि..

सुपर खुदी आयोजनाः स्थानीयको माग सम्बोधन नभए निर्माण ठप्प पार्ने