लमजुङ – मर्स्याङ्दी गाउँपालिकाको खुदी खोलामा निर्माणधीन २६ मेगावाटको सुपर खुदी जलविद्युत आयोजनाले स्थानीयको माग सम्बोधन नगरे आयोजना निर्माण कार्य ठप्प पार्ने चेतावनी दिएका छन् । 

गाउँपालिकाको वडा नं.२, ३ र ९ लाई सिमा क्षेत्र बनाई बहने खुदी खोलामा निर्माणधीन यस आयोजनाको वातावरणीय प्रभाव मूल्यांकन प्रतिवेदन (ईआईए रिपोर्ट)मा अति प्रभावित ९ नम्बर वडालाई समावेश नगरी सञ्चालन गरेको र अहिले संस्थापक सेयर (प्रमोटर सेयर)मा समेत यस वडालाई समावेश नगरेको विषय प्रति स्थानीय आक्रोशित छन् ।

आयोजनाको सरोकार तथा सहयोगी समिति साथै छरछिमेक कार्यक्रममा समेत मुख्य प्रभावित यस वडाका प्रतिनिधिलाई समावेश नगराएकोमा स्थानीयको आपत्ति छ ।

मुख्य प्रभावित क्षेत्र, यस वडालाई ईआईए रिपोर्टमा समावेश गर्ने विषयमा वडा कार्यालय मार्फत पालिका लगायत सम्बन्धीत सबै निकायमा बारम्बार ताकेताको लागि पत्रचार र सम्पर्क गर्दा समेत कुनै सुनुवाई नभएको वडा अध्यक्ष हरिश्चन्द्र थापाले बताए । 

वडा अध्यक्ष थापाले भने, ‘हामीले सम्बन्धीत सबै निकायमा पत्राचार र सम्पर्क गर्दापनि माग सुनुवाई भएन । सो कारण चैत्र ४ गते आमभेला गरी निर्णयको प्रति सहित जलस्रोत तथा उर्जा मन्त्रालयमा पत्र बुझाइयो । उर्जामन्त्रीको तोक आदेश बमोजिमको पत्र आएकाले सोहीको आधारमा चैत्र १३ गते बुधबार पुनः आमभेला बसी निर्णय मार्फत सो विषयमा यथाशिघ्र नियमानुसार प्रक्रिया अगाडी बढाईदिन आयोजना पक्षलाई पत्रसहित माग गरेका छौँ ।’

त्रिकोणात्मक सिमा भएको यस भुगोलको तीनवटा वडाबाटै खुदीखोला बग्ने र खोलाको तल्लो तटिय क्षेत्र समेत वडा नं. ९ मा पर्ने हुँदा खोला किनारका बस्ती रहेको यस वडालाई तत्काल ईआईए रिपोर्टमा समावेश गरी प्रभावित क्षेत्रको अधिकार सुनिश्चित गर्नुपर्ने आमभेलाले ठहर गरेको छ । समयमै वडाबासी आम स्थानीयको माग सम्बोधन नगरे आयोजनाको निर्माण कार्य नै ठप्प पार्ने स्थानीयले चेतावनी दिएका छन् । 

आमभेलाले आयोजनाबाट पाउनुपर्ने सबै अधिकार क्षेत्रमा समावेश गराउन माग गर्दै मागको सम्बोधन नभएमा हुने आन्दोलत तथा अवरोधको घट्नामा आयोजना पक्ष आफै जिम्मेवार रहने समेत निर्णय गरेको छ । साथै स्थानीयको माग सम्बोधन नगरे जलविद्युत तथा उर्जा मन्त्रालयमा डेलिकेशन जाने समेत निर्णय गरिएको वडा अध्यक्ष थापाले बताए ।

यता यस विषयमा बुझ्न आयोजनाका प्रोजेक्ट म्यानेजर रवि गौतमलाई मोवाइल नम्बर ९८५११३०६७३ मा पटक–पटक सम्पर्क गर्दा फोन उठेन । यस विषयमा हामी थप फलोअप गर्नेछौँ ।