लमजुङ - जिल्ला प्रशासन कार्यालयबाट सीसीटीभि बन्द गरी राती १० बजे नागरिकता कारोबार भएको घट्ना बाहिरिएपछि सो घट्ना दवाउन प्रमुख जिल्ला अधिकारी बुद्धबहादुर गुरुङले वडा अध्यक्षलाई दवाव दिएको पाइएको छ । 

लमजुङ : रातमा सीसीटीभि बन्द, प्रशासनमा नागरिकताको कारोबार शीर्षकमा तगारो न्युजमा समाचार प्रकाशित भएसँगै यस घट्ना दवाउन प्रजिअ गुरुङले पटक–पटक वडा अध्यक्षलाई दवाव दिएका हुन् । 

नागरिकता नं. ४५१०२६–१३८७७ रहेको बेसीशहर नगरपालिका–४ घर भएकी ३४ बर्षीय गुरुङ थरकी एक युवतीलाई गत फागुन २२ गते प्रशासनको सीसीटीभि समेत बन्द गरी रातीमा नागरिकता प्रदान गरिएको घट्नाबारे समाचार प्रकाशितसँगै आफुलाई प्रजिअ गुरुङबाट घट्ना लुकाउन दवाव आएको वडा अध्यक्ष गम बहादुर गुरुङले गुनासो पोखे ।  

उनले भने, ‘प्रजिअले यस घट्नालाई लिएर धेरै दवाव दिने, पत्रकारलाई सूचना किन दिइस् भनेर धम्काउने काम गरे । म सोझो मान्छे, मैले कतै गलत गरेको छैन् । जे विषय हो त्यही नै सिफारिस गरेको हो । अहिले मलाई दवाव दिएर के हुन्छ र ?’ 

उनले थप भने, ‘म सोझो मान्छेलाई उल्टै फसाउने काम भएको जस्तो लाग्छ । यतिमात्र कहाँ हो र, ति नागरिकता वाला युवतीले फोन गरेर मेरो त नागरिकता बिग्रीहाल्यो । अन्य ३ वटा भाई भारतीय सेनामा छन् एक भाई बिदेश छ । त्यो भाइलाई नेपाल झिकाएर नागरिकता बनाउन पर्यो सम्म भन्न भ्याइन ।’

प्रशासनबाट वडाको सिफारिस भन्दा गलत विवरण प्रयोग गरि नागरिकता जारी भएसँगै आफुलाई विभिन्न नम्बरबाट फोन आउने र दवाव दिने काम भएको अध्यक्ष गुरुङले सुनाए । 

नागरिकताको लागी वडाबाट दिइएको सिफारिस प्रतिलिपि ।

यता जिल्लाकै प्रमुख कार्यालयमा रातीको समयमा सीसीटीभि समेत बन्द गरी कुन उद्धेश्यले यो कार्य भयो ? यस मा को–कस्को संलग्नता छ ? यो विषयमा जिल्ला प्रहरी कार्यालयले अहिले छानविन गरिरहेको छ । 

जिल्ला प्रशासन कार्यालय, वडा कार्यालयका कर्मचारी देखी नागरिकतासँग सम्बन्धीत सबैको बयान लिने र सम्बन्धीत ठाउँमा प्रहरी कर्मचारी खटाएर अनुसन्धानका कार्य भइरहेको छ । अनुसन्धान कार्य अन्तिम चरणमा पुगेको र प्रतिवेदन तयार हुँदै गरेको जिल्ला प्रहरी कार्यालयका प्रमुख, प्रहरी नायव उपरीक्षक रेशम बोहोराले बताए । 

यता प्रमुख जिल्ला अधिकारी बुद्धबहादुर गुरुङले वडा अध्यक्षलाई कुनै दवाव नदिएको बताए । उनले भने, ‘यस्ता विषयमा प्रहरी र प्रशासनलाई खबर दिन आग्रह गरेको हो । दवाव दिइएको छैन् । 

यस विषयमा हामी निरन्तर फलोअप गर्नेछौँ ।

यो पनि.. 

लमजुङ : रातमा सीसीटीभि बन्द, प्रशासनमा नागरिकताको कारोबार