सिङ्दी – पर्यटकीय क्षेत्रमा अब्बल देखिदै गरेको क्व्होलासोथारको पर्यटन प्रवर्द्धनका विषयमा सिङ्दी गाउँमा चर्चा गरिएको छ । लमजुङ भ्रमण बर्ष २०८१, अन्तर्गत क्व्होलासोथार–५, सिङ्दी गाउँमा सरोकारवालाहरुबिच गाउँपालिकास्तरीय पर्यटन प्रवर्द्धनात्मक अन्तरक्रिया गरिएको हो । 

भ्रमण वर्षको अवसरमा यस पालिकाभित्रका पर्यटकिय गन्तव्यहरुको प्रवर्द्धनका लागि सिङ्दीमा बृहत अन्तरक्रिया कार्यक्रम गरिएको लमजुङ उद्योग बाणिज्य संघका महासचिव विपिन श्रेष्ठले बताए । 

क्व्होलासोथार गाउँपालिका भित्रका धेरै गाउँ पर्यटकीय दृष्टिकोणले आकर्षक छन् । यहाँका धेरै गाउँमा होमस्टे सञ्चालनमा छन् । धार्मिक, सांस्कृतिक, प्राकृतिक सम्पदा धेरै छन् ।

गाउँपालिका भित्रकै घलेगाउँले विश्वमा चर्चा पाईरहेको छ । सो बाहेकका घनपोखरा, भुजुङ, पसगाउँ, सिङदी, गिलुङ लगायतका गाउँहरु होमस्टेका लागि उपयुक्त गन्तव्य बनिरहेका छन् । ती गाउँमा पछिल्लो समय आन्तरिक पर्यटक भरिभराउ जस्तै हुन्छन् । केही गाउँलाई घुम्नैपर्ने पर्यटकीय गाउँ पनि भन्न थालिएको छ ।

पर्यटकका लागि क्व्होलासोथार गाउँपालिका पर्याप्त सम्भाव्यता भएको भन्दै त्यसको प्रवर्द्धनका लागि अझै धेरै काम गर्न बाँकी रहेको गाउँपालिका अध्यक्ष सूर्यप्रसाद गुरुङले बताए । उनले भने, ‘भौगोलिक विकटताको बाबजुत पनि पर्यटकहरुको आगमन बढ्दै छ । यहाँको संस्कृति, रहनसहन र परम्परामा पर्यटक झुमिएका छन् । प्रत्येक सम्भाव्यता भएका गाउँहरु छन् । तर, स्तरीय सडक निर्माणनै पहिलो आवश्यकता महसुस भएकाले हाम्रो जोड सडकमै छ ।’

उनले थपे, ‘पर्यटन प्रवर्द्धन हुँदै गर्दा स्थानियको आयआर्जन तर्फ पनि बृद्धि भएको छ । शहर झरेकाहरु गाउँ फर्कन थालेका छन् । यूवाहरु गाउँमै भविष्य देख्न थालेका छन् । पर्यटन व्यवसायबाटनै गाउँबासीले मनग्य आम्दानी गर्नसक्ने भएकोले थप प्रवद्र्धनका लागि विभिन्न निकायको सहयोग अति आवश्यक छ ।’ 

क्व्होलासोथार क्षेत्रका प्राकृतिक, धार्मिक, सांस्कृतिक क्षेत्रमा आन्तरिक पर्यटन प्रवर्द्धन गर्न सरकार र सम्बन्धित क्षेत्रले लगानी बढाउनुपर्ने लमजुङ उद्योग बाणिज्य संघका अध्यक्ष भरतकुमार श्रेष्ठले बताए । पर्यटन क्षेत्र उकास्न देशभित्रै घुमफिरको वातावरण बनाउनुपर्नेमा उनले जोड दिए । 

अन्तरक्रियामा सहभागी सरोकारवालाहरुले लमजुङ जिल्लासँगै क्व्होलासोथारका पर्यटकीय केन्द्रलाई केन्द्रबिन्दुमा राखेर आन्तरिक पर्यटन प्रवर्द्धन गर्नुपर्नेमा जोड दिए । संघ, प्रदेश तथा स्थानीय सरकारले पर्यटन क्षेत्र उकास्न विशेष योजना अघि सार्नुपर्नेमा उनीहरुको जोड छ ।

लमजुङ भ्रमण वर्ष २०८१ को प्रर्वद्धक लमजुङ उद्योग बाणिज्य संघको आयोजना एवं अन्नपुर्ण संरक्षण क्षेत्र आयोजना (एक्याप)को सहयोगमा शुक्रबार बृहत अन्तरक्रिया गरिएको हो । कार्यक्रममा लमजुङ भ्रमण वर्ष २०८१, कार्यसम्पादन समितिका सदस्य एवं पत्रकार किसान संगीतले भ्रमण वर्षमा भएगरेका गतिविधिहरु बारेमा जानकारी गराए । 

क्व्होलासोथार–५, सिङ्दीका वडा अध्यक्ष गीतबहादुर गुरुङले सिंङदी गाउँको बस्तुस्थीती र सिङदी होमस्टेका अध्यक्ष हुकुमबहादुर गुरुङले होमस्टेको विशेषताको बारे सुनाएका थिए । 

पर्यटकीय सिङ्दी गाउँमा २ सय २९ घर गुरुङ र ९ घर दलित समुदाय गरी २ सय ३८ घरधुरी छ । स्थानीयले सहभागीहरुलाई गाउँमै उत्पादित अर्गानिक परिकारहरु चखाए । यहाँ निर्माण गरिएका परम्परागत घर, स्थानीयको रहनसहन, परम्पराले सहभागीहरु दंग थिए ।  

कार्यक्रममा जिल्ला प्रहरी प्रमूख एवं प्रहरी नायव उपरिक्षक रमेश बोहोरा, लमजुङ उद्योग बाणिज्य संघका निवर्तमान अध्यक्ष गुणराज सिलवाल, जिल्ला प्रशासन कार्यालयका प्रशासकीय अधिकृत विष्णु कुमारी न्यौपाने, राष्ट्रिय अनुसन्धान कार्यालयका सहायक अनुसन्धान अधिकृत विष्णु अधिकारी, एक्यापका पर्यटन सहायक बाला घले, नेपाल पत्रकार महासंघ लमजुङका सचिव कृष्ण आले, कोषाध्यक्ष निरज अधिकारी, लमजुङ उद्योग बाणिज्य संघका पदाधिकारी एवं कार्यसमिति सदस्य, भ्रमण वर्ष समिति सदस्यहरु, विभिन्न स्थानिय तहका जनप्रतिनिधीहरु लगायत सहभागि थिए ।

संघका महासचिव विपिन श्रेष्ठले सहजिकरण गरेको सो कार्यक्रममा संघका प्रथम उपाध्यक्ष विकास श्रेष्ठले धन्यबाद सहित समापन गरे । यसअघि लमजुङ भ्रमण वर्ष २०८१ कार्य सम्पादन समितिको बैठकले विभिन्न गतिविधी गर्ने निर्णय गरेसँगै एक्यापको आर्थिक सहयोग एवं गाउँपालिकाको सहकार्यमा सिङ्दीमा पर्यटन प्रवर्द्धन सम्वन्धी अन्तरक्रिया भएको हो । 

अघिल्लो वर्षको चैत्रमा लमजुङ उद्योग बाणीज्य संघले आठौँ लमजुङ महोत्सवको अवसरमा लमजुङ भ्रमण वर्ष २०८१ को घोषणा गरेको थियो । महोत्सव समुद्घाटनसँगै राष्ट्रपती रामचन्द्र पौडेलले लमजुङ भ्रमण वर्ष २०८१ घोषणा गरेका थिए । 

भ्रमण वर्षका अवसरमा सिंगो जिल्लालाई समेटेर बृहत योजना बनाउने, सवै सरोकारवालासँग समन्वय गरी जिल्ला भरी पर्यटकिय गतिविधी सञ्चालन गर्ने, भ्रमण वर्षमा अधिकतम स्वदेशी तथा विदेशी पर्यटकलाई भित्राउने गरी तयारी गरेपनि समय अनुकुल नभएको भन्दै गतिविधी सञ्चालनमा ढिलाई भएको लमजुङ उद्योग बाणिज्य संघले जनाएको छ ।