लमजुङ – गण्डकी प्रदेशका उद्योग तथा पर्यटन मन्त्री मित्रलाल बस्यालले कोदोकोे घरेलु रक्सी अब ब्याण्ड होइन ब्राण्डिङ गर्नुपर्ने बताएका छन् ।

क्व्होलासोथार गाउँपालिका–६, पसगाउँमा आयोजित १५ औँ पसगाउँ महोत्सवको उदघाट्न गर्दैै मन्त्री बस्यालले घरेलु रक्सी ब्राण्ड बनाउने योजना सुनाएका हुन् । 

कानुनी रुपमा लोकल मदिरा बिक्री गर्न प्रतिबन्ध छ । कोदोको रक्सीलाई ‘ब्राण्डिङ’ गरी बिक्री गर्न कानुनी र व्यावहारिक पक्षको अध्ययन थालिएकाले अब यस्को ब्राण्ड बनाउनुपर्ने उनले बताए । 

कानुनी र व्यावहारिक पक्षको अध्ययन गरी स्थानीयबासीको जीवनस्तर उकास्नका लागि कोदोबाट बनाइएको रक्सीलाई ब्राण्डिङ गर्ने योजनामा पर्यटन मन्त्रालय र गण्डकी सरकार अघि बढ्ने उनले बताए । 

‘गाउँघरमा रक्सी बनाउने र बिक्री गर्ने कुरा नयाँ होइन,’ उनले भने्, ‘कानुनी समाधान खोज्छौं । ब्याण्ड भर्सेज ब्राण्डको अवधारणा अघि बढाउन लाग्छौँ ।’

विदेशबाट महँगो मदिरा आयात गर्दा देशको ठूलो पूँजी बाहिरिएको भन्दै उनले कोदोको उत्पादनलाई ब्राण्डिङ गर्न सके निर्यातको पनि सम्भावना रहेको बताए । 

‘विदेशी मदिरामा रमाउँछौं, यसले देशलाई फाइदा गर्दैन,’ उनले भने्, ‘अब लोकल रक्सीलाई ब्राण्डिङ गरेर नागरिकको आर्थिक अवस्था सुधार गर्नुपर्छ ।’ व्यवस्थित रुपमा उत्पादन गरी विश्व बजारमा पुर्‍याउने लक्ष्यका साथ सरकारले काम गर्ने मन्त्री बस्यालले बताए । 

महोत्सव फागुन १८ र १९ गते चल्नेछ । महोत्सवमा स्थानीय हस्तकला, गुरुङ जातिको कला संस्कृति र भेषभूषा, स्थानीय खानालगायतको प्रदर्शन गरिएका छन् ।

महोत्सवको माध्यमबाट ग्रामीण पर्यटन विकाससँगै ग्रामीण अर्थतन्त्रको विकास गर्ने उद्धेश्य राखेको पसगाउँ सामुदायिक होमस्टेका अध्यक्ष एवं क्व्होलासोथार गाउँपालिका अध्यक्ष सूर्यप्रसाद गुरुङले बताए । 

महोत्सवमा राष्ट्रिय स्तरका कलाकारको प्रस्तुती सँगै, स्थानीय युवा क्लव, आमा समूहका नाच, कृष्ण चरित्र, घाँटु लगायत पौराणिक नृत्यहरु प्रदर्शन गरिएका छन् ।

कूल १ सय ४५ घरधुरी रहेको पसगाउँमा पर्यटकका लागि २१ घरमा होमस्टे स्थापना गरिएका छन् ।