लमजुङ - नेकपा एमालेको सङ्गठित सदस्यबाट निष्कासित भएका पूर्वउपप्रधान तथा गृहमन्त्री भीम रावलले वर्तमान कांग्रेस–एमालेको सरकारले संविधान संशोधन गर्ने कुरा गरेर झुट बोलिरहेको बताएका छन् । 

मातृभूमि जागरण अभियान सञ्चालन गरिरहेका रावलले शनिबार बिहान बेसीशहरमा पत्रकारहरुसँग भेटघाट गर्दै यस्तो बताएका हुन् । 

‘अहिले कतिपय नेताहरूले दुई तिहाइ नभएर संविधान संशोधनको कुरा अघि नबढाएको भनेको सुनिन्छ,’ पत्रकार भेटघाटमा उनले प्रश्न गर्दै भने, ‘रातारात मिलीजुलीको हस्ताक्षर गर्ने बेला दुई तिहाइ छैन भन्ने थाहा थिएन र ?’

नेता रावलले राजनीतिक स्थायित्व दिने भनेकोप्रति पनि प्रश्न उठाए । उनले भने, ‘दुई वर्ष फलानो प्रधानमन्त्री त्यसपछि फलानो प्रधानमन्त्री भनेको के हो ?, के दुई दल मिलेर उनीहरूले जे गरे पनि स्थिरता हुन्छ र ? ।’

उनले कांग्रेस सभापति र एमाले अध्यक्ष ओलीबीच भएको भनिएको सात बुँदे सम्झौता नै अपारदर्शी रहेको बताए । ‘हस्ताक्षरित सम्झौता किन गुपचुप राख्नुको उद्देश्य के हो ?,’ उनले भने ।

कथा र बहाना नभई एजेण्डाका हिसाबले अघि सार्ने हो भने संविधान संशोधन आवश्यक रहेको तर त्योभन्दा अघि कार्यान्वयनमा जोड दिनुपर्ने उनले बताए । 

‘सबैभन्दा पहिले कार्यान्वयन गर्नतिर जोड दिनुपर्छ र कार्यान्वयनमा समस्या आए, कुन कुन विषयमा फेर्नुपर्ने हो, त्यसको निक्र्योल गरेर मात्रै संविधानको समीक्षा गर्न सकिन्छ’ उनले भने ‘तर संविधान जसरी पनि कार्यान्वयन गर्नेतिर होइन, कमजोर बनाउनेतिर राजनीतिक नेतृत्वको माइन्डसेट बनेको छ । 

नेकपा एमालेले पार्टी सदस्यबाट निष्कासित गर्दैमा आफ्ना मान्यता र प्रतिबद्धताहरू कतै पनि तलमाथि नपर्ने बताउँदै नेता रावलले यति बेला प्रधानमन्त्री केपी शर्मा ओलीले अध्यादेशमार्फत स्वेच्छाचारी शासन चलाइरहेको आरोप लगाए ।

देशव्यापी परामर्शपछि पार्टी गठनको चरणमा पुग्ने बताउँदै उनले शुक्रबार बेसीशहरमा मातृभूमि जागरणको भेला समेत आयोजना गरेका थिए ।