लमजुङ – नेपाली कांग्रेसको भ्रातृसंस्था तरुण दल लमजुङ संगठनको पूर्णकालीन सदस्यता वितरणमा सक्रिय बनेको छ । 

केन्द्रिय निर्देशन अनुसार तरुण दल लमजुङले शनिबार मर्स्याङ्दी गाउँपालिकाबाट सदस्यता वितरण कार्यको सुरुवात गरेको छ । 

केन्द्रिय समितिको निर्देशन अनुरुप मर्स्याङ्दी गाउँपालिकाबाट पूर्णकालीन सदस्यता वितरण कार्यको सुरुवात गरिएको तरुण दल लमजुङका कार्यबहाक अध्यक्ष कुम रासी गुरुङ (भुपेश)ले बताए । 

उनले भने, ‘तरुण दल लमजुङले जिल्लाभित्रका केन्द्रीय कार्यसमितिका सदस्यहरूको समन्वय र उपस्थितिमा जिल्ला कार्यसमितिको बैठक बसी पूर्ण सदस्यता वितरणको कार्यतालिका बनाएको छ । सोहि अनुरुप हामीले मर्स्याङ्दी गाउँपालिकाबाट पूर्णकालिन सदस्यता वितरण सुरु गरेका छौँ । यो कार्य अब सबै पालिकामा चल्नेछ ।’

तरुण दलले आइतबार मध्यनेपालमा कार्यक्रम गर्दैछ । शनिबार मर्स्याङ्दी गाउँपालिकामा भएको सुरुवाती कार्यक्रममा तरुण दल केन्द्रिय सदस्य बृषराज गुरुङ, जिल्ला सचिव सुरेशवावु पाण्डे, कोषाध्यक्ष जीवन चन्द्र गुरुङ लगाएत दलका पालिका प्रमुख, सदस्यहरुको उपस्थिति रहेको दलका मर्स्याङ्दी गाउँपालिका अध्यक्ष मीन प्रसाद घलेको बताए ।

वितरण गरिएका पूर्ण सदस्यताका सम्पूर्ण फारमहरू वडा–वडाबाट संकलन गरी जिल्ला कार्यसमितिको निर्णयसहित प्रतिसदस्यता एक सय लेवीसहित २०८१ फागुन २९ गतेसम्म स्वीकृतिको लागि दलको केन्द्रीय कार्यालयमा पठाउन केन्द्रिय समितिले निर्देशन गरेको छ ।