मनाङ – हिमालपारीको जिल्ला मनाङमा ५८.९ मेगावाटको नार खोला आंशिक जलविद्युत् आयोजना निर्माण गरिने भएको छ । 

नार खोला हाइड्रो इनर्जी प्रालिले यो आयोजना निर्माण गर्न लागेको हो । अध्ययन पूरा भएको यो आयोजना जिल्लाको चामे, नार्पाभूमि, नासों र मनाङ ङिस्याङ गाँउपालिकामा अवस्थित नार खोला र सोती खोलाको पानी उपयोग गरेर निर्माण गरिनेछ । 

यो अर्ध–जलाशय प्रकृतिको आयोजना हो । कम्पनीले आयोजना निर्माणका लागि जेनेरेस लाइसेन्स (उत्पादन अनुमतिपत्र) लिने प्रक्रिया अन्तिम चरणमा पुर्‍याएको छ । लाइसेन्स पाएपछि कम्पनीले निर्माण सुरु गर्ने तयारी गरेको छ ।

८ हजार ८२६ मिटर हेडरेस टनेल निर्माण  गर्नुपर्नेछ । आयोजना निर्माणसँगै वार्षिक सरदर ३४१.२८ गिगावाट घन्टा विद्युत् उत्पादन हुने कम्पनीले जनाएको छ । सुक्खायाममा १०५.७५ गिगावाट आवर र वर्षायाममा २३५.५३ गिगावाट आवर उत्पादन हुनेछ ।

आयोजनाबाट उत्पादन हुने विद्युत् ६ किलोमिटर लामो प्रसारण लाईन मार्फत धारापानी जलविद्युत् सवस्टेसनबाट राष्ट्रिय प्रसारण लाइनमा प्रवाह गरिनेछ ।

आयोजनाको सम्पूर्ण संरचनाहरू नार खोलाको बायाँ किनारमा रहने छन् । आयोजनाबाट २०८५ कार्तिकसम्म विद्युत् उत्पादन गर्ने लक्ष्य राखिएको कम्पनीले जनाएको छ ।