लमजुङ – लमजुङको खुदी खोलामा निर्माणाधीन २६ मेगावाटको माथिल्लो खुदी जलविद्युत् आयोजनाले १३२ केभीको ५ दशमलव ४ सय ९५ किलोमिटर लामो प्रसारण लाइन निर्माण गर्ने भएको छ । 

आयोजनाको प्रवद्र्धक कम्पनी सुपर खुदी हाइड्रोपावर लिमिटेडले उक्त प्रसारण लाइन निर्माणका लागि अनुमति माग्दै विद्युत् विकास विभागसमक्ष आवेदन दिएको जनाएको छ ।

कम्पनीका अनुसार आयोजनाको स्विचयार्डदेखि मर्स्याङ्दी गाँउपालिका-३, टारीकुनामा निर्माणाधीन नेपाल विद्युत् प्राधिकरणको सबस्टेसनसम्म प्रसारण लाइन निर्माण गरिने छ । 

उक्त प्रसारण लाइनको भोल्टेज १ लाख ३२ हजार भोल्ट, सिङ्गल सर्किट रहने र २६ मेगावाट सम्मको विद्युत् प्रसारण गर्न सकिने जनाइएको छ ।

प्रसारण लाइनअन्तर्गत २० वटा टावरहरू निर्माण हुनेछन् । टावरको उचाई अधिकतम २५ मिटरसम्म रहने तथा टावरहरू बिचको दूरी २ सय १० मिटर देखि ५ सय ५५ मिटरसम्म हुनेछ ।

प्रस्तावित प्रसारण लाइन निर्माण तथा सञ्चालन गर्दा उल्लेखनीय प्रतिकूल असर पर्ने भए सूचना प्रकाशित भएको मितिले ३५ दिनभित्र विभागमा वा प्रवद्र्धक कम्पनीमा आफ्नो लिखित राय प्रतिक्रिया दिन आग्रह गर्दै विभागले सोमबार सूचना जारी गरेको छ ।

आयोजना निर्माणको लागि कूल १०.०९१ हेक्टर जमिन आवश्यक पर्ने छ । जसमध्ये २० वटा टावरहरूको लागि स्थायी रूपमा जम्मा ०.२ हेक्टर जग्गा आवश्यक पर्दछ । यसबाहेक विद्युत् मार्गको अधिकार क्षेत्र भित्र अन्तर्गत ९.६९१ हेक्टर जग्गा आयोजनालाई आवश्यक पर्नेछ ।

प्रसारण लाइन निर्माणको काम १४ महिनाभित्र सक्ने लक्ष्य रहेको कम्पनीले जनाएको छ । आयोजनाले बार्षिक १३९.२२ गिगावट घण्टा विद्युत उत्पादन गर्नेछ ।