लमजुङ — गण्डकी प्रदेशका आर्थिक मामिला मन्त्री एवं प्रवक्ता डा. टकराज गुरुङले वित्तीय हस्तान्तरणका सवालमा प्रदेश र स्थानीय तहलाई संघिय सरकारले न्याय नगरेको बताए ।

नेपाल पत्रकार महासंघ लमजुङ शाखाको १६ औं साधारणसभा तथा ८ औं अधिवेशनको बुधबार बेसीशहरमा उदघाट्न गर्दै उनले मन्त्रालयहरूको योजना तथा कार्यक्रम र बजेटको प्रकृति हेर्दा संघीय सरकारले प्रदेश र स्थानीय तहको अधिकार क्षेत्र समेत मिचेको उल्लेख गरे । 

संघिय सरकारको १८ खर्ब बढी बजेट रहँदा प्रदेशमा २ खर्ब बराबरको बजेट आउनु लज्जासपद भएको उनको भनाई छ ।

मन्त्री गुरुङले संघिय सरकारले बजेटको कैयौं स्थानमा प्रदेश र स्थानीय तहसँग समन्वय गरेको भनेपनि योजना तथा कार्यक्रमका विषयमा सल्लाह र समन्वय समेत नभएको उल्लेख गरे । 

फरक प्रशंगमा मन्त्री गुरुङले जनअधिकारको क्षेत्रमा पत्रकारहरुको भुमिका सर्हानिय रहेको बताए । उनले मुलुकमा व्यवस्था परिवर्तन र जनअधिकार कायममा पत्रकारको भुमिका अग्रपंतिमा रहेको स्मरण गरे । 

पत्रकार महासंघ लमजुङ शाखाको आफ्नै भवन निर्माण लगाएतका कार्यको प्रशंसा गर्दै उनले बजेटको घेरा साघुँरो रहँदा रहँदै पनि शाखाको भवन निर्माणमा प्रदेशले सहयोग गरेको उल्लेख गरे । मन्त्री गुरुङले जिल्लाको पत्रकारिता क्षेत्रको विकासमा निरन्तर सहयोग गर्ने समेत बताए । 

उदघाट्न कार्यक्रम शाखा अध्यक्ष परमेश्वर अधिकारीको अध्यक्षतामा भएको थियो । महासंघ शाखाको अधिवेशन प्रक्रिया भने, अघि बढेको छ ।