राइनास – लमजुङको ऐतिहासिक एवं पर्यटकिय स्थल राइनासकोटमा सञ्चालित श्रीमद्भागवत महापुराण सप्ताह ज्ञान महायज्ञ २०८० शनिबार समापन गरिएको छ ।
१० दिनसम्म सञ्चालित महायज्ञमा विभिन्न क्षेत्रका सामाजसेवी, व्यक्तिहरु, समूहहरुले गरेको सहयोग तथा दानबाट करिव ३० लाख रकम संकलन भएको आयोजकले जनाएको छ ।
पुरोहित ब्राह्मण समाज ओमकार परिवार राइनासको आयोजना र राइनास नगरपालिकाको सहयोगमा चैत २९ गतेबाट महायज्ञ सञ्चालन गरिएको हो ।
वैदिक परम्पराको प्रवर्द्धन, आध्यात्मिक चेतनाको अभिवृद्धि, सनातन संस्कृतिको संरक्षणका साथै पुरातात्वीक राइनास दरबारको भग्नावशेस जिर्णोद्धार, राइनासको पहिचान जगेर्ने गर्ने उद्देश्यले महायज्ञको आयोजना गरिएको आयोजकले जनाएको छ ।
महायज्ञबाट संकलन भएको रकमबाट राइनासकोटमा धार्मिक पर्यटनको विकासका निमित्त विभिन्न धार्मिक संरचनाहरु निर्माण गरिने महायज्ञ मूल आयोजक समितिका अध्यक्ष जगतप्रसाद कट्टेलले बताए । उनले भने, ‘धार्मिक संरचना निमार्ण सँगै द्रव्य शाहको शालिक निमार्ण, नेपालको झण्डा, घण्टा स्थापना गरिनेछ । पर्यटक तथा भक्तजनको आवश्यकता अनुसारका संरचनाहरु थप्दै जाने समेत योजना रहेको छ ।’
दस दिनसम्म सञ्चालित महायज्ञमा प्रमुख वाचकको रुपमा युवा पण्डित केशव कोइराला र उपवाचकको रुपमा चेतनाथ न्यौपानेले कथा वाचन गरेका थिए ।
प्रमुख वाचक युवा पण्डित केशव कोइराला
नगरपालिकाको मात्र नभई जिल्लाकै पर्यटकिय स्थलको रुपमा परिचित राइनासकोटको विकासका लागि महायज्ञले टेवा पुग्ने विश्वास लिइएको राइनास नगरपालिका प्रमुख खड्गवहादुर गुरुङले बताए ।
समापन समारोहका क्रममा प्रमुख अतिथि जे.भी.फाउन्डेसनका केन्द्रिय अध्यक्ष प्रा.डा. जगदिश वैद्यले सहयोग तथा दान गर्नेलाई सम्मानपत्रले सम्मान गरेका थिए ।
यो पनि...
राइनासकोटमा श्रीमद्भागवत महापुराण सप्ताह ज्ञान महायज्ञ