लमजुङ - पत्रकारहरुको छाता संगठन नेपाल पत्रकार महासंघको नयाँ सदस्यता र सदस्य नवीकरणसहित महासंघको सदस्यता शुद्धीकरण अभियान चलिरहेको छ । ०७९ पुस ८ र ९ गते सुर्खेतमा सम्पन्न केन्द्रीय साधारणसभाले शुद्धीकरण समति नै गठन गरेर अभियान नै थालेको हो । 

लामो समयदेखी नयाँ सदस्यता र सदस्य नवीकरण नभएको लमजुङ शाखामा पनि केहि दिन अघि मात्र नयाँ सदस्य र नविकरण भएर आएका क्रियाशिल पत्रकारको नाम सार्वजनीक भएको छ । 

लमजुङमा नेपाल पत्रकार महासंघ लमजुङ शाखाको बैठकको निर्णय अनुसार नै नयाँ सदस्यता र सदस्य नवीकरणसहित सदस्यता शुद्धीकरण गर्न भनि सहमतीमा एक कार्यदल बन्यो । नेपाल पत्रकार महासंघ लमजुङका पूर्व अध्यक्ष एवं पूर्व केन्द्रीय सदस्य समेत रहेका नविनराज कुईकेलको संयोजकत्वमा कार्यदल गठन गरिएको थियो । कार्यदलमा नेपाल प्रेस युनियन, प्रेस चौतारी र प्रेस सेन्टरका प्रतिनिधि सदस्य रहने गरी गठन भयो । 

कार्यदलले पटक–पटकको छलफल पश्चात पत्रकार महासंघ लमजुङ शाखालाई नयाँ सदस्यता पाउन र सदस्यता नविकरण गर्न योग्य क्रियाशिल पत्रकारहरुको विवरण बुझायो । सोहि अनुसार नेपाल पत्रकार महासंघ लमजुङ शाखाले महासंघ गण्डकी प्रदेशमा सिफारिस गर्यो । ५५ जना सदस्य रहेको लमजुङ शाखाबाट २९ जनाको सदस्यता नविकरण र ५ जनाको नयाँ सदस्यताका लागी सिफारिस भयो । 

पत्रकार महासंघ लमजुङ शाखाले प्रदेशमा पठाएको विवरण ।

चार दिनसम्मको दावि विरोधको समय सहित नेपाल पत्रकार महासंघ गण्डकी प्रदेशले साउन १० गते बुधबार सदस्यताको विवरण सार्वजनीक गर्यो । प्रदेशले सार्वजनीक गरेको विवरणमा कार्यदल संयोजक समेत रहेका नविनराज कुईकेल नै फ्याकिएका छन् ।

कुईकेल सहित पूर्व अध्यक्षद्धय कृष्ण केसी, सन्तोष पौडेल र जनक श्रेष्ठ लगाएतको सदस्यता नविकरण भएन । कार्यदलका सदस्य रहेका ऋषी अधिकारीको नाम भने, जिल्ला शाखाले सिफारिश नै गरेन । मापदण्ड अनुसार छानविन गरेर महासंघ गण्डकी प्रदेशले लमजुङ शाखामा २३ जनाको सदस्यता नविकरण र ४ जनाको नयाँ सदस्यता मात्र सार्वजनीक गरेको छ । 

पत्रकार महासंघ गण्डकी प्रदेशले सार्वजनीक गरेको लमजुङ शाखाको विवरण । 

लमजुङ शाखामा तालाबन्दी
यता नेपाल पत्रकार महासंघ लमजुङ शाखाको कार्यालयमा प्रेस चौतारी लमजुङले तालाबन्दी गरेको छ । महासंघ गण्डकी प्रदेशले सदस्यता शुद्धिकरण मापदण्ड २०७९ विपरित गरेको भन्दै तालाबन्दी गरिएको प्रेस चौतारी लमजुङले जनाएको छ । 

प्रदेश समितिले सदस्यता शुद्धिकरणको नाउँमा एकपक्षीय रुपमा काम गरेको चौतारीको आरोप छ । विज्ञप्ती निकाल्दै चौतारीले जिल्लाका सक्रिय, व्यवसायिक र प्रेस चौतारीमा आबद्ध पत्रकारको सदस्यता नरहने गरी प्रदेश समितिले गरेको निर्णय र सदस्यता नामवली उपर गम्भीर ध्यानाकर्षण भएको भन्दै निर्णयप्रति आपत्ती र असहमति रहेको जनाएको छ ।

प्रेस चौतारीद्धारा जारी विज्ञप्ती ।

यता नेपाल पत्रकार महासंघ लमजुङका अध्यक्ष परमेश्वर अधिकारीले लमजुङ शाखाले सदस्यता शुद्धिकरण विबादरहित बनाउनको लागि कार्यदल गठन गरी निर्णय गरेको बताए । सोही कार्यदलको सिफारिसलाई महासंघ जिल्ला शाखाले अनुमोदन तथा निर्णय गरी हुबहु प्रदेशमा पठाएको भन्दै प्रदेशले गरेको सदस्यता शुद्धिकरण आफूलाई चित्त नबुझेको बताएका छन् ।

अध्यक्ष अधिकारीले भने, ‘प्रेस चौतारी आफैं सम्मिलित रहेर बनेको कार्यदल छ । पटक–पटकको छलफल पछि कार्यदलले बल्ल सिफारिस गरेको छ । त्यहि अनुसार प्रदेश समितिमा पठाइएको र प्रदेशले निर्णय गरेको छ । अनि चित्त नबुझेर जिल्ला शाखामा ताला लगाउनुको के औचित्य ? उनले प्रश्न गर्दै भने ।

‘जिल्ला शाखाले गरेको निर्णय र अनुमोदन भनेकै कार्यदलले गरेको सिफारिस हो, उनले भने, ‘लमजुङ शाखाको आधिकारिक धारणा भनेकै जिल्लाले पठाएको सदस्यता नामवली जस्ताको तस्तै हुनुपर्छ भन्ने हो ।’

नेपाल पत्रकार महासंघ लमजुङ शाखाद्धारा जारी विज्ञप्ती ।

नेपाल पत्रकार महासंघको ‘नयाँ सदस्यता र सदस्य नवीकरण सम्बन्धमा शुद्धीकरण मापदण्ड’
सुर्खेतमा सम्पन्न साधारणसभाबाट गठन भएको महासचिव रोसन पुरी संयोजक र पूर्वमहासचिव उजीर मगर, पूर्वसचिव धर्मेन्द्र कर्ण र रामप्रसाद दाहाल सदस्यरहेको शुद्धीकरण समितिको निर्णय, लुम्बिनीमा सम्पन्न राष्ट्रिय मिडिया सम्मेलनको सुझाव र  परासीमा सम्पन्न केन्द्रीय समिति बैठकको निर्णयअनुसार अन्तिमरुप दिइएको नेपाल पत्रकार महासंघको सदस्यता शुद्धीकरण मापदण्ड पूर्णरुपमा कार्यान्वयन गरौँ । 

१. वैशाख २५ गतेसम्म केन्द्रीय समितिले सबै सदस्यको विवरण आफ्नो वेबसाइट, फेसबुक पेज, ट्विटरलगायतबाट सार्वजनिक गर्ने, प्रदेश समितिले मातहतका सदस्यको नाम आफ्नो वेभसाइट तथा सामाजिक सञ्जालमार्फत् सार्वजनिक गर्ने, शाखा समिति तथा एसोसिएट संस्थाले वेभसाइट वा आफ्नो सामाजिक सञ्जालमार्फत् सदस्यता विवरण सार्वजनिक गर्ने । शुद्धीकरणका लागि प्रदेश समितिले महासचिव अनिवार्य रहेको समिति तत्काल गठन गरेर सम्पर्क नम्बरसहितको विवरण केन्द्रीय समितिलाई उपलब्ध गराउने । शाखा समितिले पनि आवश्यक समिति निर्माण गर्न सक्नेछन् ।   

२. सार्वजनिक भएका साधारण सदस्यले कुन सञ्चारमाध्यममा र कहिलेदेखि (विगतमा काम गरेको र अहिले काम गरिरहेको संस्थाको नामसमेत) काम गरिरहेको भन्ने विवरण शाखा समितिले जेठ २५ गतेसम्म प्रदेश समितिमा पठाउने र प्रदेश समितिले उपलब्ध विवरण अध्यावधिक गरेर जेठ ३० गतेसम्म केन्द्रीय कार्यालयमा पठाउने । नवीकरणका हकमा महासंघको विधानको दफा ५ को उप–दफा (६) अनुसार व्यक्तिगत विवरण एक पटकका लागि (काम गरिरहेको विवरण खुल्ने कागजातहरु जस्तै, नियुक्तिपत्र वा परिचयपत्र वा संस्थागत कर्मचारी विवरणसहितका कागजात) शाखामा अनिवार्य उपलब्ध गराउने । त्यसरी प्राप्त फोटोसहितको पूर्ण डिजिटल विवरण (आवश्यक कागजातसहित) शाखाले एक–एक प्रति प्रदेश र केन्द्रीय कार्यालयलाई उपलब्ध गराउने ।

३. उपलब्ध नाम तथा काममा चित्त नबुझेमा उजुरी गर्नका लागि असार १० गतेसम्मको समय निर्धारण गरिएको छ । प्राप्त उजुरी उपर प्रदेश समितिले बनाएको समितिलेआवश्यक छानवीन गरेर केन्द्रीय कार्यालयलाई असार २५ गतेसम्म जानकारी गराउने । केन्द्रमा प्राप्त सबै नाममध्ये विवादित नामका सन्दर्भमा शुद्धीकरण समितिको कार्यविधिअनुसार तत्काल टुंगो लगाउने ।

४.नयाँ सदस्यको हकमा हरेक शाखा समितिले जेठ १० गतेसम्म आवेदन लिने, आवेदनका क्रममा कहिलेदेखि कुन मिडियामा काम गरेको भन्ने प्रष्ट खुल्ने कागजात संकलन गर्ने र विधानको व्यवस्थाको पूर्ण कार्यान्वयन गरेर व्यक्तिगत फाइल नै खडा गर्ने । नयाँ सदस्यताको आवेदन उपर शाखा समितिले निर्णय लिएर प्रदेश समितिमा सिफारिस गर्ने तथा प्रदेश समितिले उक्त नामका सन्दर्भमा विवरणसहित सार्वजनिक गर्ने र जेठ २५ गतेसम्म उजुरी आव्हान गर्ने । प्रदेश समितिले असार १ गतेसम्म नयाँ सदस्यता स्वीकृति गरी अभिलेखका लागि केन्द्रीय कार्यालयलाई सिफारिस गर्ने । 

५. सदस्य नवीकरण र नयाँ सदस्यता सिफारिसका सन्दर्भमा शाखा समितिले सर्वसम्मत सिफारिस गरेका हकमा प्रदेश समितिले यहीँ मापदण्डका आधारमा निर्णय गरेर केन्द्रीय कार्यलयमा अभिलेखिकरणका लागि पठाउने । शाखाको कार्यसमितिमा विवाद भएको वा सर्वसम्मत नभएकाको वा उजुरी परेकाको हकमा प्रदेश समितिले उत्पन्न विवाद यही मापदण्डका आधारमा टुंगो लगाउने । तर, त्यसरी प्रदेश समितिमा पनि सर्वसम्मतरुपमा निर्णय हुन नसकेकाको हकमा भने शुद्धीकरण समितिले आफ्नो कार्यविधिअनुसार अन्तिम टुंगो लगाउने ।

६. प्रतिष्ठान प्रदेश अन्तरगतका शाखामा विधानअनुसारको संख्या नपुगेमा शाखा मर्जर गर्ने वा सदस्यलाई आफू खुसी जान चाहेको शाखामा स्थानान्त्रणका लागि समय दिने वा खारेजीका लागि प्रदेश समितिले केन्द्रमा सिफारिस गर्ने र शुद्धीकरण समितिले सो सिफारिस र विधानको व्यवस्थाअनुसार शाखा कायम राख्न संख्या नपुगेकाको हकमा आवश्यक निर्णय लिने । 

७. विधानको दफा ५(६) मा सदस्यता नवीकरणका लागि पत्रकारितामा निरन्तर संलग्न रहेको प्रमाण पेश गर्नु पर्ने प्रावधान रहेकाले सदस्य नवीकरण गर्दा पत्रकारिता क्षेत्रमा ३ वर्ष वा त्योभन्दा धेरै समयदेखि क्रियाशील नभएका व्यक्तिहरूलाई स–सम्मान बिदाई गर्ने र आवश्यक परेको अवस्थामा मानार्थ सदस्यतामा रूपान्तरण गर्न शाखा समितिले आवश्यक निर्णय लिने । उक्त निर्णयलाई प्रदेश समितिले अनुमोदन गरेर केन्द्रीय समितिमा पठाउने ।

८. विधानको दफा ३२ (२) मा महासंघका केन्द्रीय समिति, प्रदेश समिति वा शाखा समितिका पदाधिकारी तथा सदस्यले सो पदमा बहाल रहेसम्म कुनै राजनीतिक दल वा भ्रातृ संगठनको कुनै पनि तहको विभाग वा समितिमा रही काम गर्न नपाउने व्यवस्था गरिएकाले महासंघका केन्द्रीय समिति, प्रदेश समिति र  शाखा समितिका पदाधिकारी तथा सदस्यहरु राजनीतिक दल वा भ्रातृ संगठनको कुनै पनि तहको विभाग वा समितिमा रही काम गरेको पाइएमा सदस्यता नवीकरण नगर्ने । राजनीतिक दलका केन्द्र, प्रदेश, जिल्ला र गाउँपालिका स्तरसम्मका सबै समितिका पदाधिकारीलाई सदस्यता पनि नदिने र नवीकरण पनि नगर्ने । प्रेस हेर्ने विभाग वा प्रेस सम्बद्ध संघसंस्थाका हकमा भने यो व्यवस्था लागू हुने छैन ।

९. मिडिया हाउसको व्यवस्थापक, बजार प्रतिनिधि, प्रशासनमा काम गर्नेहरुको हकमा सदस्यता नवीकरण नगर्ने र नयाँ सदस्यता पनि नदिने नीति पूर्णरुपमा लागू गर्ने । 

१०.जनप्रतिनिधि, निजामती स्थायी कर्मचारी (सेना, निजामति, प्रहरी, गुप्तचर, सुरक्षाकर्मीसमेत), अस्थायी, करार, सेवा आयोगहरु मार्फतका सरकारी कर्मचारी, मिडिया संस्थानबाहेकका संस्थानमा कार्यरत कर्मचारी, सरकारी कार्यालयमा करार कर्मचारीको हकमा नयाँ सदस्यता पनि नदिने र सदस्य कायम रहेको अवस्थामा नवीकरण नगर्ने । सरकारी तथा गैरसरकारी क्षेत्र, बित्तिय (सहकारी, बैंक, फाइनान्स) मा पूर्णकालीन जुनसुकै पेशामा आवद्ध भएको वा मुख्य पेशा, व्यवसाय अन्य बनाएर कहिले काहीँमात्रै पत्रकारिता गर्नेको हकमा पनि नयाँ सदस्यता प्रदान नगर्ने तथा नवीकरण नगर्ने ।

११.एसोसिएट संस्थाको हकमा जेठ मसान्तसम्म संस्था दर्ता, नवीकरणलगायतका अध्यावधिक विवरण (गत असार मसान्तसम्मको) प्रदेश समिति र केन्द्रीय कार्यालयमा उपलब्ध गराउने । संस्था दर्ता तथा नवीकरणलगायतका कागजात अद्यावधिक नगर्ने संस्थालाई विधानको दफा ५ अनुसार आवद्धता सदस्यता प्रदान नगर्ने र साधारण सदस्यताका सम्बन्धमा शुद्धीकरण समितिले एसोसिएट प्रदेशको समन्वयमा आफ्नो मापदण्डमा रहेर आवश्यक निर्णय लिने । एसोसिएट संस्थाले महासंघको सदस्यता कायम गर्नका लागि महासंघको विधानअनुसारका योग्यता पुगेका व्यक्तिलाई मात्रै सदस्यता दिने व्यवस्था मिलाउने ।

१२. केन्द्रीय साधारणसभाको अधिकारसहित म्याण्डेट, लुम्बिनीमा सम्पन्न राष्ट्रिय मिडिया सम्मेलनअनुसार साउन १ गतेसम्म शुद्धीकरण समितिले दिएको प्रतिवेदन अनुसार केन्द्रीय समितिले सदस्यता सम्बन्धि विवरणलाई सूचीकरण गर्ने । विधानको दफा ५ को उप–दफा (८) अनुसार साउन १ गतेसम्म कायम सदस्यले मात्रै आउँदो महासंघको चुनावमा मतदानमा भाग लिन पाउने व्यवस्था मिलाउने ।

१३. विभिन्न पेशा व्यवसायमा आवद्ध भएर पनि पत्रकारिता क्षेत्रमा आंशिक क्रियाशील भएका व्यक्तिलाई स्वघोषणा गरेर सक्रिय सदस्यता त्याग्नका लागि शाखा समितिले सुरुवातमै आव्हान गर्ने । त्यसरी सदस्यता त्याग गरेको लिखित जानकारी गराउने सदस्यलाई सम्मानसहित शाखाले विदाइ गर्ने र आवश्यकताका आधारमा मानार्थ सदस्यता प्रदान गर्ने ।

१४. पत्रकारिताबाहेकको अन्य कामका लागि विदेश गएका महासंघका सदस्यको हकमा ६ महिना भन्दा धेरै समय विदेशमा रहेको अवस्थामा सदस्यता निलम्वन गर्ने प्रावधानलाई लागू गरिनेछ । तर, वैदेशिक शाखा नियमावलीअनुसार महासंघका वैदेशिक शाखा र आवद्ध संस्थामा सदस्यता सार्नसक्ने प्रबन्ध मिलाउने ।  त्यसैगरी सदस्यता स्थानान्तरण गर्दा महासंघका अन्य सदस्य समान पत्रकारिताको क्रियाशीलताको प्रमाण पेश गर्नुपर्नेछ । नयाँ सदस्यताको हकमा विधानअनुसारको मापदण्ड लागू हुने ।

१५. महासंघको यो शुद्धीकरण अभियानलाई कार्यान्वयन गर्ने कम्तिमा १० वटा शाखा र उत्कृष्ट प्रदेश समितिलाई केन्द्रीय महाधिवेशनमा सम्मान गरिनेछ । तोकिएको समायावधिभित्र तोकिएका समितिहरुले काम सम्पन्न नगरेमा शुद्धीकरण समितिले आफ्नो कार्यविधिमा रहेर काम टुंगो लगाउने ।
रोसन पुरी 
महासचिव